على امتداد شارع مذبح  الرئيسي وبعد جولة طويلة  جاب  فيها شوارع المنطقة ،يمشي بخطواتٍ بطيئة، متكئاً على عصاه التي وحدها من بقت الى جواره  بعد أن  خذلته الايام و السنين...

تحدثت اليه  رغم اصراره الشديد على الصمت الذي فضله على نفسه، بعد ان  كذب عليه الكثير من الناس بتسجيله  في الضمان الاجتماعي  كأقل مايمكن ان يحظى به  من فرصة العيش هو وزوجته العجوز و (عمر وعبدالله وشروق)   أطفاله الثلاثة .

وبطريقة صادمة  وجدتني أمام رجل يصارع  الأرصفة  والشوارع بحثا عن القوت الضروري،  سيما شيخوخة العمر الذي بلغ الــ (70) عاما- حد قوله – إنه الحاج  علي عثمان مهير، وهذا هو اسمه المفروغ إلا من شظف العيش ،يكابد الحياة دونما فائدة تقيه حر الشمس وتعب الارصفة وجوع الأبناء.

•كيف حالك يا حاج ؟

الحمدلله  على العافية  يابني، بتحس  الشمس حار وشوف حالتي كيف هي ،ما قد أكلت حاجة لا ذلحين ..مشيت من  الجبل رجل ولامعي قرش وانا ضعيف الله.

 • وين تشتي تسير  يا حاج ؟

أرض الله واسعه يا ولدي، أمشي تجاهي تجاهي بين يد الباري، الذي ما يفلت احد، بجوده وكرمه، أما الناس محد ينفعك هذي الايام  الا ويشل عليك حاجة، حتى  اخوك يابن آدم  ماعد يعملك شي .

•معك عيال يا والد ؟

آه.. يا ولدي خليها على الله لا عد تقلب المواجع  الله يسترك بستره ..عيالي ماتوا، كان معي (5) ماتوا اثنين في حرب صعدة  وهم  يشتغلوا  في مزرعة ، وبقى ثلاثة صغار. . الله يحفظهم  مقاضيهم  خيرات  يشتو أكل ويشتو ملابس ويشتو ويشتو ويشتو ... وأمهم الله يحسن خاتمته  من حين ماتوا الجهال تدهورت حياتها وانا  تبهذلت في الشوارع لا محجا ولا منجا.

•  وين ساكنين يا حاج ؟

معنا  دشمه من الكراتين والطرابيل  تحت الجبل في شارع  الخمسين ، خلها على الله  يا ولدي  نعيش بين التراب والغبار حياة نكده ، الماء نعبي دباب من الجامع حق الحارة اذي بعيد من الجبل ، والعيال يمرضوا  ولا نحصل حق العلاج  ، وانا اقوم في الصباح ألوي في الشوارع ... والله ما يفلت احد، يحولي  بناس طيبين  يدولي  أكل، وارجع أروح  عند العيال حقي  ادلهم أكل.

• طيب أشتي أخدمك يا حاج قلي أيش اعمل؟

إهي  قد خدموني قبلك أصحاب البلاد، والله ما قد فعلو حاجه كذبوا عليّ، ولا عد ابصرت لهم وجه،  أنته بتشتغل أين يا ولدي. !

•    أنا طالب في الجامعة

الله يعينك ويسهل رزقك يا ولدي انتبه تكون عاصي لبوك .

•    لكن مشكلتك باتحل – إن شاء الله – ماتقلق أبدا يا حاج ..البلاد با تسبر و انشاء الله تجي دوله تهتم  بك  وتجيب لك  سكن ومعاش، بس تشتي صبر  وتحمل .؟

ليحين يا ولدي .. الموت فَرّاق، محد يركن انه يعيش ساعة واحدة، وبعدين يابني المسؤولين حق هذي الأيام  كودهم  يوبهوا لأنفسهم  وماعد يهمهم الناس، الله يرحمه إبراهيم الحمدي كنا عايشين أحلا عيشه، أما اليوم  ماعد بش حاجة سوء لا رئيس  ولا دولة، نهبوا الدنيا كلها،والذي بايجي  هو مثل الاولين ، لا تسهن خير كلهم سرق ، يأكلوا لحالهم واحنا  وعيالنا نموت لان مابش معانا ظهر ياولدي .

•    طيب ..قلي اسمك  على شان أنزلك  في الصحيفة .؟

لي منعك يابني لا تنسى اسمي علي عثمان مهير ، واذا به حاجة تعالي انا في مذبح الشارع الرئيسي واذاما حصلتني   جي للعشه قد أمرت لك اينهيه.